مقالات كتير جدًا بتتكلم عن إزاي تكلم طفلك المكفول عن كفالته، طب بالنسبة لطفلك من النسب، إزاي تكلمه عن الكفالة وإزاي تخليه يستعد لوصول أخوه بالكفالة ويرحب بيه. ضروري قبل ما نقولكم على النصايح إنكم تبنوا علاقة قوية بطفلكم من النسب يكون أساسها الثقة والأمان والصدق والانفتاح في الحوار.
ضروري يكون في علاقة تواصل قوية بينكم وبين طفلكم قبل ما تكلموه عن قرار الكفالة.
وضروري كمان تختاروا الوقت المناسب عشان تقولوله قراركم، وميكنش مثلًا وقت حصل فيه مشكلة بينكم وبين طفلكم بسبب درجات امتحان أو مشكلة مع صديق أو جار، ضروري إن الطفل ميربطش قراركم بموقف سلبي معين حصل منه.
وضروري جدًا تعرفوه إن قراركم مش متعلق بيه لكن رأيه مهم، وإن الكفالة قرار متعلق بالكبار ومش معناها أبدً إنه قليل أو مش كفاية.
ودي خمس نصايح بتقدمها ليكم "كفالة" عشان تساعدكم في الكلام عن الكفالة مع ابنكم من النسب وتساعدوه على الترحيب بأخوه المكفول:
1- قول لطفلك إن كل الناس محتاجة للحب:
ممكن طفلك من النسب يحس بالغيرة تجاه أخوه المكفول، ودا شيء وارد وطبيعي وبيحصل بين الأشقاء من النسب، فهم طفلك إن أخوه المكفول محتاج للحب زي أي شخص في الكون وإنكم مصدر الحب دا، ودا هيساعد طفلك في إنه يتخطى غيرته ويتحمس لمساعدة أخوه ورعايته.
2- اتعلم لغة الكفالة الإيجابية وعلمها لطفلك:
ضروري عشان تقدر تساعد طفلك المكفول إنك تعلم طفلك من النسب الكلمات المناسبة عن الكفالة، متقولش قدامه طفلك إن أهل أخوه اتخلوا عنه أو سابوه، قول مثلًا إنهم اختاروله الكفالة عشان كانوا عايزينه يعيش حياة أفضل مع أسرة أفضل.
3- كلم طفلك عن الاختلافات:
لو طفلك المكفول شكله مختلف بشكل ملحوظ عنكم كلم طفلك عن الاختلافات بين الناس، وإن الاختلافات في الشكل مش معناها حد أحسن من التاني ولا معناها إن الشخص المختلف غير مرغوب فيه، الاختلاف ماهو إلا تنوع ظاهري مش بيتبني عليه أي حاجة.
4- خلي طفلك يشارك في الاستعدادات لاستقبال أخوه:
وانت بتشتري أغراض طفلك الجديد أو وانت بتضبط الأوضه عشان تسع طفلين بدل طفل واحد، اطلب المساعدة من طفلك وشاركه في التحضيرات قدر الامكان وقوله إنك ممتن جدًا لمساعدته وإنك حقيقي سعيد بأسرتكم وهي بتكبر.
5- نصيحة أخيرة:
الصراحة والجو المنفتح من أكبر أدوات النجاح اللي هتساعد طفلك من النسب على التأقلم مع الكفالة، شجع طفلك على الأسئلة وجاوب عليها بشكل صريح وكامل عشان يكون على استعداد يرحب بالفرد الجديد اللي هينضم لأسرتك.
