كفالة طفل يتيم في البيت مش بس وسيلة لبناء الأسر أو زيادة عدد أفرادها، ولا بس بتعوض الطفل المكفول عن أسرته اللي فقدها، لكنها كمان حل جذري لمشكلة أطفال دور الرعاية، وأحيانًا بتكون الحل المثالي لبعض الأزواج اللي بيعانوا من مشاكل في الإنجاب، واحنا في "كفالة بنقدملكم 10 أسباب بتوضح ليه الكفالة هي الحل الجذري والمثالي لمشكلة أطفال دور الرعاية.
١- بناء الأسرة:
الكفالة بتسمح لكل طفل اتحرم من إن يكون ليه أم وأب من النسب بإنه يكون ليه أب وأم كافلين يقوموا بكل مهام أمه وأبوه من النسب، ويوفروله كل اللي محتاجه، وكمان بتسمح لكل زوج وزوجة اتحرموا من نعمة الإنجاب بإنهم يكون ليهم ابن يقوموا على رعايته ويحققوا حلمهم في الأمومة والأبوة.
٢- توفير حياة كريمة للطفل:
دور الرعاية مهما كانت بتوفر للطفل احتياجاته المادية، لكنها مش بتوفر له الاحتياجات النفسية والعاطفية، والطفل فيها مش بيقدر يعيش حياة مستقلة يتمتع فيها بخصوصيته على عكس الحياة الأسرية اللي بيلاقي فيها الطفل الحب والدعم النفسي والعاطفي.
٣- تنشئة طفل سوي نفسيًا ومجتمعيًا:
مشكلة كبيرة من مشكلات دور الرعاية إن بعض الأطفال بيطلعوا منها مش قادرين على التفاعل مع المجتمع بشكل سليم بسبب انعزالهم في الدار لفترة طويلة من حياتهم، وفي بعض الدور بتسبب مشاكل نفسية للأطفال بسبب سوء تعاملهم مع الأطفال إما بالضرب أو بالإهانة.
٤- التنشئة الصحية للطفل:
من أضرار دور الرعاية إنها ممكن تسبب بعض المشاكل الصحية للأطفال، بسبب غياب الاهتمام وغياب النظام الصحي والرعاية الصحية في بعض الدور، وأثبتت الأبحاث كمان إن وجود الأطفال في الدور بيأثر بشكل سلبي على تكوين الدماغ ودا بدوره بيأثر على النمو الجسدي والمعرفي للطفل، على العكس لما الطفل يكبر وسط أسرة تقدمله كل الحب والحنان والدعم اللي محتاجه عشان يكبر بصحة كويسة.
٥- حماية الطفل من الاستغلال المجتمعي:
بعد ما الطفل يكبر ويخرج من الدار بيكون عرضة للاستغلال المجتمعي بسبب غياب مصدر للتوجيه والنصح وبسبب سوء الحالة المادية، على عكس الطفل لما يكبر في أسرة توفرله كل احتياجاته المادية وتساعده في الحصول على فرصة تعليم كويسة، ووظيفة مستقلة.
٦- حماية الطفل من استغلال دور الرعاية:
للأسف بعض الدور غير الأمينة على أطفالها بتستغل الأطفال عشان تلم تبرعات لمصالحها الشخصية، ومنهم اللي بيخفي التبرعات دي عشان يوحي للزوار إن الدار بحاجة للتبرعات، وبرغم كدا الطفل مش مستفيد بأي شيء من التبرعات دي، بالعكس هو حالته بتسوء يوم ورا التاني، عشان كدا كفالة الأطفال داخل أسر بتحميهم من استغلال بعض مديري الدور، وكمان بتوفرلهم حياة كريمة.
٧- حفظ أموال الناس والدولة:
لو كل أسرة ضمت طفل لأسرتها ممكن يكلف الأسرة جزء من أموالها، لكن وجود الطفل في دار الرعاية بيستهلك كتير جدًا من أموال الدولة والتبرعات، في حين إن الفايدة اللي عايدة على الطفل أقل بكتير من الفايدة اللي هتعود عليه لما يتربى داخل أسرة.
٨- مجتمع خالي من الضغائن:
لما طفل دار رعاية بيشوف طفل ماشي ماسك إيد أبوه أو أمه بتحضنه في الشارع غصب عنه بيتولد جواه مشاعر غضب، ويسأل اشمعنى أنا اللي مليش أم وأب، الكفالة بتضمن لكل طفل حقه في وجود أسرة ترعاه وبالتالي بتقضي على مشاعر الغل أو الحسد اللي ممكن يضمرها بعض أطفال دور الرعاية لباقي أطفال المجتمع.
٩- المساواة المجتمعية:
الكفالة هي نوع من أنواع المساواة بين أفراد المجتمع، لأنها بتخلي كل طفل يكبر وهو عايش في أسرة، يعني مفيش طفل مميز عن التاني ولا طفل شأنه أقل من التاني، كلهم سواسية وليهم أسرة، حتى لما يكبروا فكلهم متساويين مفيش حد ليه أسرة وحد ملوش.
١٠- مستقبل أفضل:
الكفالة بتضمن لكل طفل حقه في مستقبل أفضل عن لو كمل حياته في دار رعاية، الطفل المكفول بيقدر يلاقي تعليم أفضل ومتابعة أحسن عن طريق أسرته، وبالتالي وظيفة أفضل ومستقبل أحسن ليه ولأسرته المستقبلية، ودا في النهاية بينعكس على المجتمع ككل، على العكس لو الطفل كمل حياته في دار رعاية في الغالب بيكون تعليمه ووظيفته مش قادرة توفرله حياة سعيدة تضمنله مستقبل أفضل ليه ولأولاده.
عشان كل الاسباب دي الكفالة هي الحل الجذري والمثالي لمشكلة أطفال دور الرعاية، وليها تأثير إيجابي على الأفراد والمجتمع ككل، ولو كل طفل في دار رعاية بقى ليه أسرة فاحنا بنضمن لمجتمعنا ولكل أطفالنا مستقبل أفضل، غير طبعًا الثواب العظيم عند ربنا وهو مجاورة الرسول عليه الصلاة والسلام في الجنة "أنا وكافل اليتيم في الجنة هكذا" وأشار بالسبابة والوسطى.
