برغم فرحة الوالدين الكافلين بوصول ابنهم إلا إنه من الطبيعي جدًا إنهم يمروا ببعض المخاوف، المخاوف دي في الحقيقة مخاوف طبيعية جدًا، وبتمر بيها معظم الأسر الكافلة خلال رحلة كفالتها.
واحنا في "كفالة" بنقدملكم أشهر 3 مخاوف للأسر الكافلة وأفضل الطرق لمعالجة المخاوف دي.
١- "هل هقدر أحبه كأنه ابني اللي ولدته؟"
خبراء كتير جاوبوا على السؤال دا وكانت الإجابة "أيوة هتقدروا تحبوه زي ابنكم من نسبكم تمامًا بدون أي اختلاف، حتى لو كانت الكفالة مختلفة، ومحصلش حمل ٩ شهور أو ولادة، لكن في النهاية هتنشأ بينكم علاقة ترابط، علاقة هتحتاج لشوية وقت عشان تتبني، ودا شيء طبيعي، حتى إن كتير من الآباء والأمهات من النسب محسوش بالرابطة دي بمجرد ولادة طفلهم، واحتاجوا لفترة من رعاية طفلهم عشان يكونوا علاقة الترابط بينهم وبينه"
٢- "أنا خايف معرفش اتكلم مع ابني عن حقيقة كفالته"
الطفل المكفول لما بيكبر وارد جدًا إنه يمر بمشاعر حزن بسبب خسارة أسرة نسبه وأصله، ودا بيحصل بغض النظر عن عمر الطفل وقت كفالته وبغض النظر عن إذا كان عنده ذكريات بخصوص أسرة نسبه أو لأ، لكن المشاعر دي مش بتظهر قبل عمر ٧ أو ٨ سنين، عشان كدا هيبقى من السهل جدًا تتكلم مع طفلك بخصوص كفالته لو كنت منفتح على الكلام عن الكفالة في سن مبكر، سرد قصة طفلك بطريقة تناسب عمره من البداية، والتأكيد على إن بعض الأسر بتتكون عن طريق الحمل والولادة وأسر تانية بتتكون عن طريق الكفالة هيسهل على طفلك تقبل الأمر كل ما يكبر، حتى لو كان طفلك كبير وقت كفالته كلمه عن أسرة نسبه، قول لطفلك "صوتك جميل جدًا، اكيد ورثته من مامتك من النسب"
مهمة الوالدين الكافلين بتتمثل في إنهم يخلوا الآباء من النسب والكفالة جزء من المحادثات بينهم وبين طفلهم، بحيث إنهم يدوا للطفل فرصة يعبر عن مشاعره بخصوص كفالته وبخصوص أسرة نسبه.
الكلام عن الكفالة بشكل طبيعي هيساعد طفلك يفهم إنه لو حس بالحزن بخصوص قصته فهو يقدر يتكلم عنها لأن في حد هيفهمه ويسمعه.
٣- هل ممكن الطفل يكون بيعاني من بعض المشاكل الصحية أو النفسية؟؟
قبل كفالة طفلك انت من حقك تسأل أي سؤال يخص حالته الصحية، وواجب على الأشخاص المسؤولين في الدار إنهم يقدمولك بيانات واضحة عن حالة الطفل الصحية.
لكن برغم كدا مفيش ضمانات إن طفلك يفضل على نفس حالته الصحية طول حياته، وراد جدًا إنك تستلم طفل طبيعي تمامًا مش بيعاني من مشكلات صحية لكن يظهر عنده مشاكل فيما بعد، وقتها مطلوب منكم تتصرفوا زي أي أب وأم اكتشفوا إن ابنهم بيمر بمشكلة صحية.
احنا في "كفالة" بنهنيك على قرارك بالكفالة، وبنضمنلك إنك هتندهش من الحياة الجميلة اللي في انتظارك بعد كفالة طفلك.
