بعد وفاة مامتها، لقت ليلى في الدولاب ورق غريب جدًا، كان أول مرة تشوفه وكان من ضمن الورق شهادة ميلاد، الورق دا كان صدمة حياتها لما قرأت اللي فيه وفهمت إنه يخصها وإنها مكفولة من أكتر من 35 سنة، وقتها حست ليلى بالخيانة والخداع وإن حياتها كلها مش حقيقية، حست بإنها مهزوزة وإن حياتها كلها عبارة عن كذبة"
برغم القصة دي وكل القصص المشابهة ليها لسه في ناس بتخفي حقيقة كفالة طفلها عنه وعن كل الناس وبتتظاهر بإنه ابنها من نسبها، في الواقع كل الأطفال المكفولين بيعرفوا الحقيقة سواء لما بعد ١٠ أو ٢٠ أو ٥٠ سنة.
وكل ما بيعرفوا متأخر كل ما كانت الحقيقة أصعب عليه في تحملها وتقبلها، وفي الحالتين الشخص المكفول بينهار وحياته كلها بتدمر وبيحس إنه حياته كلها عبارة عن كذبة كبيرة وإن كل تفاصيل حياته اتبنت على خداع.
لما طفلك بيعرف حقيقة كفالته من صغره بيكون عنده أسئلة بخصوص كفالته كل ما يكبر، وأكبر غلط ممكن يقع فيه الأبوين الكافلين إنهم يتكلموا عن الكفالة مع طفلهم بشكل مفرط أو ميتكلموش عنها تمامًا كأنها حاجة غلط مفروض تستخبى، واحنا في "كفالة" هنساعدك إزاي تحقق التوازن مع طفلك في الكلام عن الكفالة.
شرح الكفالة:
كتير من الأسر الكافلة شبهوا شرح الكفالة بشرح حقائق الحياة زي شرح الأمور الجنسية مثلًا، وكانت دي بعض نقط التشابة بين شرح الكفالة وشرح الحقايق:
• مينفعش تستنى لحد ما طفلك يكبر عشان تكلمه عن الكفالة، هيبقى صعب عليه يتقبل الحقيقة وهيوجهلك أسئلة صعبة.
• كل ما الطفل يكبر كل ما بيكون فهم الكفالة معقد أكتر بالنسباله.
• الكلام عن الكفالة مع الطفل بيبقى صعب أحيانًا على الآباء والأمهات زي ما مثلًا الكلام عن التطورات الجنسية والجسمانية مع أطفالهم صعب عليهم.
طب ايه الأسباب اللي بتصعب على الأبوين الكافلين مناقشة الكفالة مع أطفالهم؟
١- مناقشات الكفالة بتبقى سبب في استحضارهم لآلام عدم قدرتهم على الإنجاب
٢- خوفهم من إن طفلهم يحس بإنه غير مرغوب فيه.
٣- معندهمش معلومات كافية عن الطفل يشاركوها معاه لو سأل عن حياته قبل الكفالة.
٤- الخوف من المشاعر السلبية اللي ممكن تسببها مناقشات الكفالة.
٥-الخوف من عدم قدرتهم على تفسير فكرة الكفالة لطفلهم، والخوف من عدم قدرة طفلهم على فهم الكفالة، فبيتأخروا في المناقشات بسبب قلقهم.
في الحقيقة إنت محتاج تتكلم مع طفلك عن حقيقة كفالته لأنه محتاج يسمع كل تفاصيل قصة كفالته منك، واحنا في "كفالة" بنقدم لك أهم النصايح اللي هتساعدك خلال كلامك عن الكفالة مع طفلك.
تقول لطفلك إيه وامتى؟
اتفق الخبراء المتخصصين على إن سن ٣ أو ٤ سنين هو أصغر سن للطفل يقدر يفهم فيه إنه اتولد لأم مختلفة غير أمه اللي بتربيه، ويعتبر دا أفضل وقت لبدء مناقشات الكفالة بينك وبين طفلك بتفاصيل قليلة لكن بعبارات إيجابية جدًا، ومع نمو طفلك تقدر تخصص معلومات لكل مرحلة سنية بحيث تناسب الطفل على المستوى الفردي والتنموي.
بعض الخبراء نصحوا الآباء الكافلين إنهم يكلموا طفلهم عن كفالته من سن الرضاعة، زي إنهم يقولوله "إنت طفلي المكفول الجميل" لكن خبراء تانيين اعترضوا لأن شايفين إن الطفل الرضيع مش هيقدر يفهم يعني إيه كفالة غير إن التكرار الثابت للجملة دي ممكن يخلي بعض الآباء والأمهات يركزوا على كلمة "مكفول" أكتر ما يركزوا على جملة "طفل جميل".
أحد الأخصائيين في علم نفس الطفل قال "الطفل الرضيع مش محتاج يعرف عن الكفالة، الطفل محتاج الحب والرعاية والعناية والأمان"
وبكدا نقدر نقسم مراحل نمو الطفل اللي هناقشه فيها عن الكفالة لـ ٣ مراحل:
مرحلة الطفولة (ما قبل المدرسة): ٣-٥ سنين
مرحلة المدرسة: ٦-١٢ سنة
مرحلة المراهقة: ١٣-١٨ سنة
حط في اعتبارك إن أعمار الأطفال متفاوتة في كل مرحلة من المراحل دي تبعًا للتطور الفكري والعاطفي لكل طفل، فمثلًا ممكن تلاقي طفل ٧ أو ٨ سنين ومازال في مرحلة الطفولة، أو طفل عمره ٥ سنين لكنه ناضج جدًا وعنده قدرة أكبر على الاستيعاب من معظم الأطفال في نفس عمره.
استنونا هناقش معاكم في المقالات الجاية كيفية منافشة الكفالة مع كل مرحلة عمرية، وإيه خصائص كل مرحلة وإيه اللي بيدور في بال الطفل عن كفالته في كل مرحلة من مراحل حياته.
