لأن الأسر الكافلة بتقابل تحديات كبيرة في المجتمع بسبب اختلاف طريقة تكوينها عن أسر النسب، فدي أشهر 10 معلومات بتحتاج الأسر الكافلة من الناس إنها تعرفها عنهم:
١- احنا منختلفش عن أسر النسب:
احنا كأسر كافلة نشبه تماماً الأسر اللي اتكونت عن طريق الحمل والولادة من جميع النواحي مع وجود اختلافات بسيطة.
يعني مثلًا علاقة الترابط والحب اللي بينا وبين طفلنا المكفول أو بين طفلنا المكفول وأخواته هي نفسها العلاقة اللي بتتكون بين أفراد الأسرة اللي بتربطهم علاقة دم.
يمكن يكون في بعض الاختلافات زي اختلاف الشكل، أو اختلاف في طريقة التكوين، لكن في النهاية الحاجة الوحيدة الأكيدة إن أي أسرة كافلة بتحب بعضها زي أسرتك بالظبط.
٢- احنا أسرة حقيقة:
مفيش حاجة ممكن نقولها نبرر بيها إننا أسرة حقيقية لأن احنا بالفعل أسرة حقيقية، عشان كدا مفيش داعي تستخدم في كلامك أي حاجة توحي بإننا مش أسرة حقيقية.
٣- الكفالة مش معناها إني منقذ للطفولة:
مش معنى إني كفلت طفل إني بعمل فيه معروف أو بقيت شخص عظيم عشان كفلته.
ولا الكفالة جايزة تعويضية للأسر اللي بتعاني من تحديات في الإنجاب.
الكفالة مش اختيار أحسن أو أوحش من الولادة، هي مجرد اختيار، هي ممكن متكنش الاختيار المناسب لكل الناس، لكنها مناسبة لكتير منهم.
٤- مفيش أي مشكلة لو معندكش معلومات بخصوص الكفالة:
في ناس كتير معندهاش معلومات كافية عن الكفالة، وممكن يكون عندها معلومات مغلوطة
عشان كدا مفيش مشكلة من إنك تسألنا وتثقف نفسك، لكن خلي أسألتك بشكل سليم مش فضولي ومش قدام الطفل طبعًا ولا قدام أي حد تاني.
الأفضل إنك تسأل وتعرف الإجابة السليمة و الصحيحة بدل ما تنشر معلومات خاطئة تضر بالطفل أو بأسرته الكافلة أو بمجتمع الكافلين في العموم، ممكن تبدأ أسألتك ب "ممكن تسمحلي أسأل أسئلة بخصوص الكفالة؟"
٥- مش كل قصص الكفالة زي بعضها:
مش كل قصص الكفالة زي بعضها ولا كل الأسر بتمر بنفس التحديات والمشاكل، فيه تحديات مشتركة لكن في نفس الوقت كل أسرة ليها قصتها المختلفة تمامًا.
عشان كدا يفضل إنك متفترضش أي معلومات عن أي أسرة كافلة بدون ما تسمعها منهم، ولو مهتم ممكن تسألنا على انفراد.
٦- احنا مش هنقدر نشاركك كل التفاصيل:
احنا كأسر كافلة بنحاول قدر الإمكان نحترم حق طفلنا في الخصوصية، عشان كدا ممكن منقدرش نشاركك كل تفاصيل قصة كفالته مهما كنت مقرب مننا.
في أسر بتحس بالراحة في مشاركة التفاصيل أكتر من غيرها والعكس، ومهما شاركنا معاك تفاصيل هيكون في تفاصيل أكتر إنت متعرفهاش، وكل المطلوب منك إنك تحترم حق كل شخص في الحفاظ على خصوصيته وخصوصية طفله تماما زي ما بتعمل انتا مع أسرتك.
٧- فكر قبل ما تتكلم:
أسئلة كتير وتعليقات كتير هيكون الأفضل لو فكرت فيها قبل ما تسألها.
أسئلة زي
"إزاي أهله قدروا يتخلوا عنه؟"
"انت مش قلقان أهله يظهروا وياخدوه تاني منك؟"
"الولد محظوظ جدًا عشان كفلته"
"شكلك هتحملي قريب"
الأفضل لو تفكر في مدى الأذى اللي ممكن تسببه لينا الأسئلة والتعليقات اللي من النوع دا قبل ما تقولهالنا.
ياريت تفكر في أسئلتك وتعليقاتك قبل ما تقولها وتساعدنا نصحح المعلومات الغلط اللي عند الناس، لأن احنا مش كفاية علشان نصحح لكل الناس المفاهيم الغلط . انتا معانا هتوصل المعلومة أكتر.
٨- الطفل بيكبر:
لأن الطفل المكفول مش هيفضل رضيع ومسيره هيكبر، وفي كمان أطفال مكفولين بيتم كفالتهم في سن كبير، ضروري جدًا إن الطفل يحس إنه مرحب بيه وإن الكفالة كمان مرحب بيها في المجتمع.
عشان كدا لازم يكون فيه تثقيف وتوعية عن الكفالة ويكون في تغيير لكل الوصمات والأفكار الغلط عن الكفالة وعن الطفل المكفول.
٩- مستخدمش لفظ مكفول بدون داعي:
احنا أسرة من أب وأم وأبناء، مش لازم لما تيجي تقدم طفلنا لحد تقول عليه "ابنهم المكفول" اسمه "ابننا" من غير أي اضافات أو تصنيفات.
بلاش تصنفونا في كل مقابلة أو في كل تجمع على إننا أسرة مختلفة، احنا فعلاً فخورين بكفالة طفلنا، بس مش عايزين طفلنا يحس طول الوقت بإنه مختلف، احنا أسرة عادية جداً.
١٠- احتفل معانا:
برغم إن الكفالة بيكون فيها بعض خساير للطفل بعد ما خسر أسرة النسب وخساير للوالدين بالكفالة بسبب عدم القدرة على الإنجاب في بعض الأحيان.
إلا إن لحظة وصول طفلنا بالنسبالنا لحظة تستحق الفرحة والاحتفال، ووجودك جنبنا وإظهار الفرحة شيء هيسعدنا ويفرق معانا جدًا.
احنا محتاجينك تكون جزء من لحظاتنا السعيدة وخصوصًا لحظة وصول طفلنا.
