ناس كتير بعد ما بتكفل طفلها بتحس بالعجز أو بفقدان السيطرة على الأمور بسبب قلة المعلومات اللي يعرفوها عن طفلهم، عشان كدا هيبقى أفصل لكل أسرة كافلة لو جمعت أكبر قدر من المعلومات عن طفلها اللي هتكفله قبل الاستلام، عشان تقدر تتعامل مع الوضع بشكل أحسن بعد وصول طفلها للبيت.
ناس تانية بيبقى عندها قلق من الصفات الوراثية اللي ممكن يكفلها الطفل عن أبويه من النسب
احنا في "كفالة" يهمنا إن كل الأسرة تكون متطمنة وهي بتكفل طفلها، عشان كدا هناقش معاكم كل الاستعدادات الوراثية وكمان أهم المعلومات الطبية والبيئية اللي مفروض تعرفوها قبل كفالة طفلكم.
الإحصاءات الحيوية:
لما توصل لمرحلة اختيار طفلك اللي هتكفله، في بعض الأسئلة الخاصة بالحالة الصحية والبيئية للطفل ضروري تسألها، زي:
- ايه هو تاريخ ميلاد الطفل؟ وهل تاريخ ميلاده تقريبي ولا حقيقي؟
- كان كام وزن الطفل وقت ولادته أو وقت العثور عليه؟
- وكان إيه محيط رأسه وقتها؟ لو مفيش أي بيانات طب إيه محيط رأسه دلوقتي وهل مناسب لعمره ولحجم جسمه؟
- هل نمو الطفل طبيعي بالنسبة لعمره؟
- هل طفلك خجول ولا اجتماعي؟ هادي ولا مشاغب؟
- هل للطفل أي أخوات ؟ وهل في أي معلومة عن مكانهم؟
- ايه الأمراض اللي اتصاب بيها الطفل؟ واتصاب بيها في أي عمر؟ وايه العلاج اللي كان بياخده؟ ورقم الدكتورة اللي كانت بتتابع في الدار للتواصل معاها
- ايه أهم ميزة لطفلك؟ وإيه اكبر تحدي بيعاني منه؟
ولو هتكفل طفل أكبر من سنتين، فدي بعض الأسئلة اللي ممكن تسألها عشان تتعرف عليه بشكل أفضل
- الطفل كان عايش فين قبل ما يجي الدار؟ وكام عدد الدور اللي دخلها ؟؟
- ايه أهم التجارب الإيجابية أو السلبية اللي مر بيها الطفل؟
- هل للطفل أي أخوات؟ وهل في أي معلومة عن مكانهم؟
- هل الطفل اتعرض لأي اعتداء ؟ أو اتعرض لإهمال من أي نوع؟
- هل الطفل بياخد أي علاج؟ وليه ومين اللي وصفهوله؟
في بعض دور الرعاية بتساعد وبتقدم للأسر البديلة الكافلة سجل طبي في كل المعلومات الطبية والصحية عن الطفل المكفول، لكن للأسف مش كل الدور بتوفر النوع دا من المساعدة.
اطلب من المسؤولين ومن المشرفين أي سجلات طبية خاصة بطفلك، لكن في العموم سواء قدرت تاخد سجل طبي لطلفك أو لأ، حط في اعتبارك إن الأطفال في دور الرعاية بيتلقوا رعاية صحية غير كافية بوجه عام.
ومن المفترض إن أي طفل استمر وجوده في الدار لأكتر من سنة كاملة فهو محتاج لفحص طبي شامل بعد ما استلامه.
مش بس المعلومات اللي هتجمعها عن طفلك مهمة، لأ دا كمان المعلومات عن الأبوين من النسب وعن عيلته الممتدة مهمة، لكن يكاد يكون مستحيل إنك تعرف معلومات عنهم لو هتكفل طفل معثور عليه (كريم النسب).
الجينات والوراثة
في الواقع كلنا عندنا ميول وراثية سواء كانت إيجابية أو سلبية، فمثلًا بعض الناس بيورثوا ميولهم لارتفاع ضغط الدم، وخبراء كتير أكدوا إن في ميول وراثية للمشاكل النفسية بيتم توارثها بين الأجيال.
طبعًا غياب المعلومات الطبية الأساسية والوراثية لأسرة نسب الطفل يعتبر تحدي كبير بيواجه الأسر الكافلة وقت اختيار طفلهم.
لكن المشكلة دي ممكن يتغلبوا عليها بالبحث وبتسجيل المعلومات المتاحة وقت كفالة طفلهم وتسجيل أي معلومة أو ملحوظة جديدة أثناء نمو طفلهم، وبكدا يقدروا يستخدموا المعلومات دي لما يحتاجوها وكمان ينقلوها لطفلهم لما يكبر.
الخلاصة:
١- لما تختار طفلك اللي هتكفله جمع أكبر قدر من المعلومات عنه من يوم ولادته لحد يوم استلامه، اعرف كان وزنه ايه وقت الولادة او وقت العثور عليه، وهل نموه البدني مناسب لعمره؟
٢- لو في أي معلومة عن الحالة الصحية أو الوراثية لأسرة نسب الطفل ضروري تحتفظ بيها.
٣- مفيش طفل مثالي، ومتحسش بالضغط أو القلق لو كفلت طفل وانت مش عارف عنه أي معلومات، مع الوقت هتقدر تتعرف عليه أكتر وتعرفه كويس جدًا.
