أي أسرة في انتظار طفل رضيع بعد رحلة حمل ٩ شهور بتستعد بتحضيرات كتير جدًا عشان تستقبل طفلها، وبرضو أي أسرة هتكفل طفل، هتحتاج تقوم بنفس الاستعدادات ويمكن هتحتاج لاستعدادات أكتر شوية قبل وصول طفلها وبعد وصوله.
واحنا في "كفالة" بنقدم لك ١٠ حاجات تعملها وقت وصول طفلك المكفول البيت لأول مرة.
١- تجهيز غرفته والبيت باللي يناسب سنه:
يعني لو رضيع نتأكد إن كل حاجه موجودة زي الحفاضات وغير من احتياجات الأطفال الرضع.
لو طفل بيزحف أو بادئ يمشي نأمن البيت كويس ونغطي فيش الكهربا ونشيل الحاجات القابلة للكسر اللي يقدر يوصلها.
ولو طفل أكبر شوية نتأكد إن الشبابيك والأبواب متأمنة كويس.
٢- توفير احتياجات البيت:
حاولوا توفروا كل احتياجات البيت قبل وصول الطفل، عشان تبقوا مركزين مع الطفل ومش مشغولين باحتياجات البيت.
٣- البحث عن دكتور أطفال كويس في محيطكم:
اطلبوا من الجيران أو الأصدقاء إنهم يرشحولكم دكتور أطفال كويس، وحددي معاد كشف، وبعد وصول طفلك وديه اطمني عليه.
٤- البحث عن حضانات كويسة في محيطكم:
اعملوا زيارة للحضانات عشان تشوفوا مستوى رعاية الأطفال فيها ايه، لو عندكم نية تودوا طفلكم حضانة بعد وصوله
٥- قضاء أكبر وقت مع الطفل وقت وصوله:
يعني نقلل من مشاوير السوبر ماركت، والزيارات، والمقابلات، والتواجد في الأماكن العامة اللي ممكن حد فيها يضايق طفلك، وياريت لو نتجنب الاحتفالات ويُفضل منعملش حفلة وصول للطفل إلا بعد فترة من وصوله.
٦- فترة الأمومة والأبوة المكثفة أو بيسموها (الشرنقة):
عبارة عن قاعدة أساسية بتقول إن كل سنة قضاها الطفل قبل كفالته مفروض تتعوض بشهر كامل يقضيه مع الأب والأم، يعني لو في إمكانية تاخدوا أجازات وتعوضوا الطفل بالفترة دي فدا هيكون أفضل للطفل وليكم.
٧- الروتين:
قدرتك على تلبية رغبات طفلك بطريقة منظمة نابعة عن الحب، بيخلي طفلك يحس بالثقة والامان، فانتي كأم ممكن تعملي جدول زمني كدا بمواعيد الوجبات والنوم ووقتك الخاص مع طفلك، وبكدا طفلك هيحس إنك مصدر امان وقادرة على رعايته وتلبية احتياجاته.
٨- الروتين يعزز الثقة:
عشان الروتين بيخلق الثقة والاحساس بالانتماء فدي بعض الأمثلة عليه:
تغيير الحفاضات
لبس النوم
غسل الاسنان
قراءة كتاب
تظبيط الإضاءة
أغاني هادية
أحضان وبوسة قبل النوم
كل دي حاجت تقدروا تنظموها بالطريقة اللي تناسبكم، وبالطريقة دي طفلك هيتعلم منكم طريقة حياتكم ويحس بانتمائه ليكم.
٩- مش وقته:
الفترة الأولى لوجود طفلك في البيت مش فترة تصحيح عادات سيئة أو تعويد الطفل على العادات الصحيحة.
دي فترة إنشاء علاقة ترابط وحب واتصال، عشان كدا دا مش وقت فطام من الببرونة، او تدريب على البوتي، ولا تدريب الطفل على النوم لوحده.
شيلوا الطفل كتير لما يصحى بليل يعيط، ضموه ليكم وادوه حب وحنان، رضعوه وقت ما يطلب.
دا مش دلع ولا تدليل، انتوا بس بتساعدوه إنه يحس بأمان، حتى لو الطفل طلب ينام جمبكم لفترة، ادوله مساحة الأمان اللي محتاجها، لسه العمر قدامكم طويل عشان تصححوا العادات الغلط وتعلموه دروس في الحياة.
١٠- هون على نفسك:
خليك حنين على نفسك، مفيش حاجة بتحصل صح ١٠٠%، في هفوات وأخطاء .
هيجي وقت وهتفقد صبرك، هيجي وقت وهتحس إنك مش كافي أو إنك مش راضي عن نفسك، كل دا طبيعي.
ولو كان الدرس الأول اللي هتقدمه لطفلك هو الثقة، فالدرس الأول ليك هو التسامح مع الذات، الأبوة والامومة صعبة على الكل مش بس على الأسر الكافلة.
اغفروا لنفسكم، وكل يوم اعتبروه بداية جديدة، تربية طفل أيًا كان مولود او مكفول حاجة صعبة وعظيمة في نفس الوقت.
