ممكن يكون قرار الكفالة من أجمل القرارات اللي هتاخدها في حياتك لكنه ممكن يكون في نفس الوقت من أكتر الأمور الصعبة والمعقدة اللي هتواجهها.
كفالة طفل معناها إنك محتاج تتصالح مع عدم قدرتك على الإنجاب ومع محاولات الحمل غير الناجحة.
معناه إنك محتاج تتعامل مع الأسئلة والتعليقات من حواليك بإيجابية وإصرار عشان تتغلب عليها وتغير أفكار الناس من حواليك، لكن في الحقيقة كفالة طفلك تستحق كل دا وأكتر.
احنا في "كفالة" بنقدملكم ٤ حاجات مفروض تعرفوها قبل كفالة طفل:
١. كل حاجة هتتغير:
من أنقى أو أطهر النوايا هي كفالة طفل و حبه، وجود طفل في حياتك هيفتح قلبك وعقلك على قدرات مكنتش تتخيل إنها عندك قبل كدا.
وبصرف النظر إذا كان الطفل دا ابنك من نسبك أو بالكفالة فكل حاجة في حياتك هتتغير، حتى أدق التفاصيل.
إنك تاخد قرار بفتح قلبك وبيتك لطفل وترحب بيه بكل حب في حياتك عشان تربيه وتقوم برعايته، دي مش مهمة سهلة.
حتى القرار نفسه مش بتاخده في يوم وليلة، قرار الكفالة بيحتاج منك ساعات وأسابيع من التفكير والتحضيرات عشان تقدر تاخده كقرار نهائي، لكن بمجرد ما بتاخده بتبدأ حياة كاملة من المفاجأت والمكافآت اللي عمرك ما كنت تخيلها.
٢. حماس الكفالة:
وارد جدًا بعد كفالة طفلك إنك تكون متحمس لمشاركة تجربتك مع الناس من حواليك، حتى بعض الأشخاص اللي خاضوا تجربة الكفالة من قبلك هيحبوا يشاركوا تجربتهم معاك، وحتى الناس اللي معندهمش خبرة في الكفالة ويعرفوا أشخاص كافلين هيحبوا هما كمان يشاركوا بأي معلومة عندهم.
هتقابلك أفكار ونصايح من كل الناس حواليك، من الأهل والأصحاب ، خد منهم المعلومات والنصايح اللي هتنفعك واستفيد من اللي مر بتجربة مشابهة لتجربتك.
٣. حدد خياراتك:
الكفالة بتضمنلك عدد كبير من الاختيارات زي سن الطفل وجنسه وحالته الصحية، ضرروي قبل ما تاخد قرار الكفالة تكون محدد اختياراتك وعارف نوع وجنس الطفل اللي انت عايز تكفله.
ضروري كمان يكون عندك خطة مالية واضحة.
كل ما قضيت وقت في تحليل التحديات اللي ممكن تقابلك وايه أفضل الطرق لمواجهتها كل ما هتوفر على نفسك وقت وجهد كبير بعد كفالة طفلك.
٤. الكفالة يعني الحب:
في بعض الناس بيكون عندها اعتقاد بإن الأسر الكافلة مش بتقدر تحب طفلها المكفول زي ما هما بيحبوا أطفالهم من نسبهم.
في الحقيقة دا كلام مش صح خالص، الحب غير المشروط من الأم والأب لطفلهم بيبدأ في اللحظة اللي بيتولد فيها ابنهم من قلبهم.
مشاركة الجينات وفصيلة الدم مش هي السبب في الحب اللي بيتولد بين الأب والام وأولادهم، حبك لطفلك سواء كان من نسبك أو مكفول هو من أكبر النعم في حياتك.
احنا في "كفالة" بنهنيك على قرارك بالكفالة ، وبنضمنلك إنك هتندهش من الحياة الجميلة اللي في انتظارك بعد كفالة طفلك وإسأل مجرب .
