لأن كفالة طفل إلتزام ومسؤولية كبيرة، ففي ناس بتتردد كتير قبل ما تاخد قرارها، وبتفضل انها تطلب رأي ومشورة بعض الأشخاص اللي بتثق فيهم، لكن في النهاية القرار قرارهم هما، واحنا في كفالة هنساعدك عن طريق إننا نقدملك أربع لمؤشرات بتدل على استعدادك للكفالة:
1- استكشاف الكفالة والبحث عنها:
الكفالة عملية مش سهلة وبتحتاج لاجراءات وشروط، وبتحتاج منك تعرف كويس إنت داخل على ايه، فلو انت بحثت عن كل الحاجات دي وحاولت تطابق الشروط بكل الطرق، وحاولت تتواصل مع ناس عندهم خبرات في الكفالة فدا يدل على استعدادك للكفالة، أما لو معندكش فكرة عن الاجراءات ولا الشروط ولا طبيعة اللي انت داخل عليه فانت في الغالب لسه مش مستعد ومحتاج تثقف نفسك أكتر عن الكفالة قبل ما تاخد قرارك.
2- التصالح مع عدم القدرة على الإنجاب:
لو كان عدم القدرة على الإنجاب هو دافعك للكفالة، وكنت فعلًا قدرت تتقبل خسارتك وتعافيت بالفعل من وجع قلبك على خسارتك دي، فانت مستعد للكفالة، أما لو كنت لسه بتحلم بطفل من نسبك فالأفضل إنك تأخر الكفالة شوية لحد ما تقدر تتصالح تمامًا مع فكرة عدم القدرة على الإنجاب، الكفالة وسيلة لتوفير أسرة وحياة كريمة لطفل لكنها مش وسيلة لإصلاح كسر قلوبنا، انت بتكفل طفل عشان يكون ابنك مش بديل لابنك اللي مقدرتش تنجبه.
3- الاستعداد لتحديات الكفالة:
اجراءات الكفالة غالبًا بتكون طويلة ومعقدة ومرهقة نفسيًا، لو انت مستعد للتحديات دي ومستعد لكل السيناريوهات المحتملة فدي إشارة على استعدادك للكفالة.
4- القدرة على الالتزام بكونك أم كافلة/أب كافل:
لو حاسس بإنك هتكون والد كافل على درجة عالية من الالتزام من البداية وعندك صبر وإصرار على إنك تكمل في طريقك للنهاية مهما كانت الصعوبات فدا مؤشر كبير على استعدادك للكفالة.
نصيحتنا ليكم:
إنك تبقى أب/أم سواء كان عن طريق الإنجاب أو الكفالة فدا يعتبر التزام مدى الحياة، لو مش عندك اطفال وقررت تكفل طفل فـتأكد تمامًا إنك مدرك للكفالة بكل تحدياتها ومستعد ليها، ولو عندك طفل بالفعل فـتأكد إن عندك وقت وطاقة لرعاية طفل تاني، في بعض الأحيان الأطفال المكفولين بيكون عندهم تحديات إضافية فوق فكرة الكفالة نفسها، عشان كدا انت محتاج تكون مستعد عاطفيًا ونفسيًا وماديًا لأي تحديات ممكن تقابلك، لو لسه حاسس إنك مش متأكد فمفيش مشكلة من تأخير القرار لفترة لحد ما تتأكد من قرارك وتتأكد من استعدادك للكفالة ولكل حاجة متعلقة بيها قبل ما تاخد خطوتك الأولى.
