لو عايز تعرف إزاي تسهل على نفسك وعلى طفلك أول مرحلة بعد وصوله وتساعده على التكيف جوا أسرتك فاحنا في "كفالة" هنساعدك تعدي أول مرحلة بعد كفالة طفلك بسهولة..
انتقال طفل لأسرة جديدة مش شيء سهل، حياة الطفل وعالمه كله بيتغير تغيير جذري بمجرد انتقاله لبيت جديد، في أطفال بتتكيف مع الوضع الجديد بسلاسة، وأطفال تانية لأ، ومش معنى إن الطفل ليه ردود صعبة أو تعامل مش ظريف في البداية إنه رافض بيته الجديد.
في البداية ممكن الطفل يعاني من نوبات غضب متكررة، أو يبكي بصورة مستمرة، أو ينسحب وينام كتير، كل الصعوبات دي طبيعية جدًا، لكن في مبدأين مهمين جدًا هيساعدوا طفلك على التكيف مع بيته الجديد بصورة أسهل.
المبدأ الأول: دخّل التغييرات لطفلك بصورة تدريجية، حاول تحتفظ بروتين المكان اللي كان الطفل موجود فيه قب كفالته لأطول فترة ممكنة، وخلال الفترة دي حاول تغير من الروتين بصورة تدريجية، والروتين يشمل كل حاجة مواعيد النوم ومواعيد الوجبات وحتى الروايح ونوع الأكل نفسه.
وكل ما قدرت تقدم للطفل التغيرات بصورة تدريجية كل ما هتكون قادر على كسب ثقته أكتر وكل ما هتبقى مسيطر على الأمور أكتر.
المبدأ التاني: قدم لطفلك الرعاية والراحة باستمرار على أد ما تقدر، ومع الوقت طفك هيقدر يثق فيك ويحس إنه يقدر يعتمد عليك في تلبية احتياجاته، ومن الثقة دي بيجي التعلق ودا الأساس في تكوين علاقتكم.
وهنا بنقدملكم خمس استرتيجيات مهمة تقدروا تستخدموها مع طفلكم من أول يوم لتسهيل انتقال الطفل وتكيُفه بسهولة في بيته الجديد:
1- اللقاء الأول: غالبَا معظم الآباء الكافلين وخصوصًا الأمهات بيكونوا عايزين أول ما يشوفوا الطفل يشيلوه ويحضنوه، أحيانًا الحركة دي بتكون صعبة على الطفل ومش مريحة، ادوا الطفل وقته عشان يتعرف عليكم الأول، ممكن تبدأ بإنك تعرفه على نفسك في الدار قبل ما تستلمه وهو حد شايله من مقدمي الرعاية المألوفين بالنسباله، أحيانًا الطفل بيكون خايف أو مش مستوعب أو مش آلفك، عشان كدا هو محتاج تدوه وقته.
معظم الآباء بتميل لفكرة إنها تحمّي الطفل أول ما يوصل البيت وتلبسه لبس جديد، للأسف ممكن ميكنش دا أفضل حاجة تقدر تقدمها لطفلك بعد وصوله، الطفل محتاج شوية وقت عشان يعتاد عليكم وعلى البيت، ممكن تلعبوا معاه لعب بسيط بعد وصوله وتقدموله وجبة بسيطة وتحاولوا تتعاملوا بطبيعية جدًا، وتصبروا على موضوع الاستحمام دا قبل النوم مثلًا أو لتاني يوم، وحاولوا قدر الإمكان متغسلوش لبس الطفل القديم اللي كان لابسه في الدار يوم استلامه لمدة كام يوم، ولو لقيتوا طفلكم بيعاني من صعوبة في النوم حطوله هدومه على السرير، ريحتها المألوفة ممكن تساعده على الإحساس بالراحة والنوم.
2- الأكل: لو كان الطفل جاي من مكان مفيهوش نظام صحي غذائي، فضروري تلبي احتياجات طفلك الغذائية وتهتمي بيها جدًا، ولو كان الطفل لسه في مرحلة الرضاعة اتأكدي إنك بتلبي احتياجاته العاطفية مع الرضاعة، لو كان الطفل بيستخدم لبن صناعي اعرفي طفلك كان بيستخدم لبن ايه وحاول تكملي عليه لفترة قصيرة على الأقل.
حتى لو كان الطفل كبير على الرضاعة ممكن تسمحيله بالرضاعة لو طلبها خلال فترة تكيفه مع بيته الجديد، وبرغم إن الدكاترة بتنصح بعدم استخدام الببرونة لفترات طويلة لأنها ممكن تضر بأسنان طفلك، فانتي ممكن تقللي من الخطر دا عن طريق إنك تديه رضعة واحدة بس في أوقات الوجبات، وضروري تحضني طفلك وقت الوجبات أو الرضاعة، عشان يقدر يربط دفا جسمك بالأكل وتقديم الرعاية.
3- النوم: متستغربيش لو لقيتي طفلك بيواجه صعوبة في النوم بليل، ممكن يكون بيخاف من الضلمة، أو مش بيعرف ينام في مكان لوحده، أو بيعاني من الكوابيس، لو حسيت إن طفلك بيعاني من صعوبات النوم، ففي كذا طريقة تقوله بيها إنه مش لوحده وإنك جمبه، زي إنكم تنقلوا سرير البيبي لأوضتكم، أو تنامي جمبه في أوضته لو كان طفلك أكبر، المهم إن طفلك يبقى قادر يسمع نفسك ويحس بأمان وجودك جمبه، لو معندكوش مانع من فكرة السرير العائلي فممكن تسمحوا لطفلكم ينام جمبكم على سريركم عشان يحس بأمان أسرته الجديدة.
ومهما كان ترتيب النوم اللي هتقرروه وهيناسب أسرتكم، فمينفعش أبدًا إنك تسيبي طفلك المكفول مبقالوش كام يوم إنه يصحى بليل يصرخ أو يعيط من غير ما يلاقيكي جمبه، الطفل محتاج يحس إنه مش لوحده وإنكم جمبه بليل وبالنهار عشان يقدر يثق فيكم.
4- الروتين: لو طفلك قضى وقت قبل كفالته في دار رعاية، فأكيد هو متعود على جدول وروتين مبيتغيرش، طبعًا انتي مش مضطرة تلتزمي بنفس الروتين ومواعيد النوم أو الأكل اللي اعتاد عليها طفلك قبل انتقاله لبيتك، لكن في العموم وجود روتين متوقع والبيت كله ملتزم بيه هيساعد الطفل إنه يفهم إيقاع حياته الجديدة ويتجاوب معاه.
بمجرد وصول طفلك هيكون في رغبة في زيارتكم من قرايبكم وأصحابكم، بس حاولوا تأجلوا الزيارات شوية أو تحصروها في شخص واحد أو اتنين، لحد ما الطفل يقدر يتعود على بيته الجديد ويتعود على ريحته وإضاءته والأصوات اللي فيه، ويعتاد عليكم انتوا شخصيًا قبل ما تقدموله ناس جديدة.
حتى فكرة التسوق بالطفل ممكن تسببله ارتباك في الأسابيع الأولى من وصوله.... رحلة الملاهي كمان مش وقتها خالص دلوقتي، لسه عندك طفولة كاملة تقدروا تروحوا فيها كل الأماكن اللي تيجي في خيالكم.
5- الوقت: تقضية فترة من الوقت لوحدكم مع طفلكم الجديد، هتسهل عملية تكيف طفلك مع وضعه الجديد وهتساعدكم انتوا كمان على التكيف، لو قدرتوا تاخدوا أجازة من الشغل أول فترة يوصل فيها الطفل البيت هيكون أفضل ليكم وليه، وهيساعدكم تألفوا بعض أكتر، وتعتادوا على بعض أسرع.
