"أنا بكرهك، انتي مش امي الحقيقية، أمي الحقيقية مكنتش هتعمل معايا كدا"
المرة الأولى اللي هتسمعي فيها من طفلك المكفول الكلام دا، هتحسي إنك محطمة تمامًا، وهتفضلي تسألي نفسك عن إذا كنتي أم كفء ولا لأ، وإذا كان طفلك عمره ما حبك فعلاً؟!
في الحقيقة إن طفلك لما قال كدا، هو مكنش قاصد أبدًا الكلام اللي قاله، هو كان منفجر عاطفيًا بسبب غضبه لأنك مسمحتيلوش يعمل الحاجة اللي هو عايزها أو عشان مشتريتيش ليه اللعبة اللي كان عايزها أو عشان عاقبتيه على غلط معين عمله
طب ايه الحل؟؟
الحل إنك تتعاملي مع نوبات غضب طفلك بنفس طريقة الآباء من النسب، يعني راجعي نفسك وشوفي إذا كنتي فعلًا على حق في رد فعلك ولا لأ، هل العقاب مناسب لفعل طفلك ولا انتي أفرطتي في العقاب؟ لو اكتشفتي إنك على حق، يبقى تمسكي بكلامك ورأيك، لأن طفلك لو اكتشف إنك بتتغاضي وبتنفذيله رغبته عشان متسمعيش منه الكلام دا، فهو هيستخدمه مرة واتنين وعشرة عشان يضغط عليكي ويحقق رغباته.
طب تردي تقولي ايه على طفلك في الوقت دي؟ قولي لطفلك إنك بتحبيه وإنك فعلًا مضايقة على زعله، وإنك هتأجلي الكلام بخصوص إنك أمه الحقيقية لوقت تاني يكون فيه أهدى شوية، كمان ممكن تضيفي لطلفك إن الطفل اللي بيتربى مع أسرة نسبه برضو بيكون عنده حدود وقواعد وأسرته مش بتسمحله يعمل كل حاجة هو عايزها.
