الغيرة بين الأخوات طبيعية وليها أشكال كتير، فمثلًا أحيانًا هتضطري للتعامل مع غيرة طفلك الكبير من الاهتمام الكبير الموجه لأخوه الرضيع الجديد، وأحيانًا هتضطري للتعامل مع غيرة ابنك الصغير من أخوه الكبير لأنه مش معندوش نفس صلاحيات أخوه الكبير ومش قادر يعمل كل حاجة زيه.
في الحالتين، في خطوات وتكتيكات معينة تقدر تعمليها عشان تقللي من حدة الغيرة بين أولادك، وتعززي علاقة صحية بينهم.
واحنا في "كفالة" هنساعدك أكتر على بناء علاقة صحية بينك وبين أولادك وبين أولادك وبعضهم، عشان تقللي حدة الغيرة بينهم وتعيشوا حياة سعيدة بأقل المشاكل والضغوطات الممكنة.
أولًا: إزاي تساعدي طفلك الكبير على التأقلم مع مولود جديد:
طبعًا طفلك الكبير اعتاد إن هو الطفل الوحيد في البيت وإن كل الاهتمام والرعاية موجهة ليه، فمش شيء غريب إنه يحس بالغيرة لما يوصل طفل جديد يسرق كل وقتك وانتباهك.
أولًا: مينفعش تلومي على طفلك الكبير بكلام يوحي إنه مش مقدر جهدك مع طفلك الصغير، لأن دا هيزيد من استياءه، فمثلًا بدل ما تقولي لطفلك "أنا مش هقدر أساعدك عشان أنا لازم أرضع أخوك دلوقتي" قوليله "عشر دقايق وهاجي أساعدك"، وبدل ما تقولي "أنا مش هقدر أروح معاك المكتبة دلوقتي عشان دا وقت نوم أخوك" قوليله "إيه رأيك نروح بعد الغدا؟"
تعبيرات كتير جدًا ممكن تقوليها بدون قصد تزيد من استياء طفلك من اخوه، لكنك لو عبرتي عنها بطريقة تانية هتقدري تكسبي طفلك الكبير، وتتجنبي توصليله إحساس إنه لازم يتحمل خساير وصول أخ جديد ليه.
ثانيًا: من المهم كمان إنك تحافظي على مشاعر الحب والاهتمام تجاه ابنك الكبير بعد وصول أخوه، حاولي تركزي معاه وتمدحيه لما تلاقيه بيعمل حاجة كويسة خصوصًا لو كانت متعلقة بالطفل الجديد أو متعلقة بمساعدتك، قوليله "أنا بجد فخورة بيك، مساعدتك دي بتفرق معايا جدًا، أنا بحبك جدًا"
. لو طفلك الكبير شال أخوه الصغير وحضنه قوليله "أنا كنت عارفة إنك هتبقى أطيب وأحن أخ كبير في الدنيا"
ثالثًا: برغم إنه ممكن يكون صعب عليكي في البداية إنك تنظمي وقتك، لكن حاولي تخصصي لطفلك الكبير وقته الخاص بيه، حتى لو 10 دقايق قبل النوم تتكلموا فيهم، أو تحكي ليه حكاية قبل النوم، وحاولي تحافظي على الوقت الخاص لكل طفل من أطفالك حتى بعد ما يكبروا، لان كل طفل محتاج لوقت يحس فيه بإنه مميز ومحبوب.
نصائح لتقليل التنافس بين الأخوات في مرحلة الطفولة...
كل ما أطفالك يكبروا وكل ما كان عندك أطفال أكتر كل ما الأمور هتبقى أصعب، لأنك هتحتاجي تتعاملي مع غيرة كل واحد منهم، دي بعض النصايح اللي ممكن تعمليها عشان تقللي من حدة المنافسة والغيرة بينهم:
- قسمي المسؤوليات بالتساوي: لما تحصل مشكلة بين أطفالك وبعضهم، حاولي متوجهيش اللوم لطفل واحد بس حتى لو كان ظاهر إن هو اللي بدأ المشكلة، خليكي واضحة في إن المشكلة اللي حصلت دي مسؤوليتهم هما الاتنين.
- قللي من شأن مشاعر الغيرة: حاولي متبالغيش في رد فعلك لما تلاقي حد من أطفالك حاسس بالغيرة من التاني، يكفي إنك تعترفي بمشاعره وتقولي ببساطة "أنا عارفة إنك حاسس بالغيرة، أحيانًا الشعور بالغيرة بيبقى حاجة طبيعية" وكملي كلامك وقوليله "أنا عارفة إنك أخ طيب وحنين، إيه رأيك لو ننزل نتمشى سوا؟"
- اتجنبي المقارنة: ممكن يكون حد من أولادك أشطر من التاني في الرياضيات مثلًا، أو ممكن يكون طفلك الكبير أسرع من أخوه الصغير في الجري، تجنبي تماماً المقارنة بين أطفالك في القدرات أو السلوكيات، كل اللي عليكي إنك تطلبي من طفلك يقارن نفسه بقدراته السابقة، زي إذا كان حسن مهاراته في الكتابة أو حقق أهداف أكتر في مباريات الكورة أكتر من السنة اللي فاتت..
- تجنبي الألقاب السلبية: تصنيف أطفالك بألقاب سلبية زي "القصير" أو "الكلبوظة" أو أي لقب سلبي حتى لو كان من باب الهزار، غالبًا بيسبب استياء وغيرة بين الأخوات وبيعرضهم للتنمر، لو عايزة تلقبي كل طفل من أطفالك بأسماء دلع، تجنبي إن الاسم يكون ليه أي دلالة سلبية.
- حددي معاد خاص لكل طفل: معظم الاستياء والغيرة بين الأطفال بتحصل بسبب اعتقادهم إن بابا أو ماما بيحبوا طفل أكتر من التاني، عشان كدا حاولي توفري لكل طفل جزء من وقتك يكون وقت خاص بيه لوحده، عشان كل طفل يتأكد إنه ليه مكانة خاصة في قلبك، مش شرط تقضوا الوقت دا بشكل خيالي، ممكن يكون قعدة حلوة مع بعض تقرأوا فيها كتاب وأخوه الصغير نايم، أو تتفرجوا فيها على فيلم وأخوه الكبير في المدرسة.
الغيرة والتنافس بين الأخوات طبيعية، لكنك تقدري تقللي من حدتها بذكائك وصبرك، توقعي إن دايمًا هيبقى في مشاكل وتنافس وإنك مش هتقدر تتخلصي منها في لمح البصر، واعرفي إن تقبلك لمشاعر الغيرة اللي بيحس بيها طفلك هو أول خطوة لتقليل حدتها.
