كتير من المقالات بتهتم بالعلاقة بين الطفل المكفول وأمه الكافلة، واحنا في "كفالة" بنهتم جدًا بالعلاقة بين الطفل المكفول وأبويه الكافلين مش بس أمه، عشان كدا قررنا نقدم مقال لكل أب كافل نساعده بيه على تقوية علاقته بطفله المكفول.
طبعًا واحدة من أجمل تجارب الحياة إنك تبقى أب كافل، لكنها ممكن تجربة موترة جدًا خصوصًا يوم وصول طفلك البيت لأول مرة، طبيعي إنك تقلق إذا كنت هتقدر تتواصل مع طفلك وتبني معاه علاقة قوية ولا لأ، في الحقيقة الآباء الكافلين قادرين تماماً على تكوين روابط قوية مع طفلهم زي الآباء البيولوجيين، ودي بعض النصايح اللي هتساعدك على تقوية علاقتك بطفلك المكفول:
- استعد للتحلي بالصبر:
متستعجلش على تكوين علاقة ترابط قوية بطفلك من أول يوم، لأن الترابط عملية بتحصل بمرور الوقت، تحلى بالصبر واعرف إن قدامك عمر كامل تقوي فيه علاقة الترابط بينك وبين طفلك.
- توقع بعض العقبات على طول الطريق:
توقع إن طفلك ممكن يكون منزعج أو بيعاني من صعوبة في النوم أو عنده مشاكل في الأكل خصوصًا في الأيام الاولى من وصوله، توقع إن طفلك ممكن يحاول يختبر حدودك عن طريق بعض السلوكيات المزعجة، عشان كدا حاول تركز على مدح سلوكيات طفلك الإيجابية عشان تعززها.
- قسم المسؤوليات:
حط في اعتبارك إن الطفل بيكون مستعد أكتر للترابط عن طريق تلبية احتياجاته، شارك زوجتك في تلبية احتياجات طفلك وفي تحمل مسؤولياته، ساعد في تغيير الحفاضات وفي تحضير الرضعات وتقديم الرضعات لطفلك، ساعد في واجبات المدرسة لو طفلك أكبر سنًا، احضن طفلك كتير وعرفه إنك موجود دايمًا علشانه.
- تواصل مع طفلك لغويًا:
بغض النظر عن عمر طفلك، فالكلام معاه هيزيد من التواصل بينكم، اقرأ لطفلك القصص بصوتك، اتناقش مع طفلك عن اهتماماته وأفكاره ومشاعره، انزل لمستوى طفلك وتواصل معاه بصريًا وانت بتكلمه، الكلام مع طفلك هيعزز من قوة المفردات عنده وهيحسسه بإنه يستحق اهتمامك.
- علم طفلك بعض المهارات:
من أجمل الطرق لتعزيز دورك كأب هو تعليم طفلك المهارات الحياتية، اشرح لطفلك ايه الخطوات اللي بتعملها وإنت بتحضر العشا أو وانت بتصلح العربية أو وانت بتحلق دقنك حتى لو بطريقة مرحة أو مضحكة، دا هيصنع عند طفلك ذكريات جميلة عن كل الحاجات اللي بابا علمهاله.
- علق الصور العائلية:
واحدة من الحاجات اللي بتحسس الطفل المكفول إنه جزء من أسرته إنه يشوف صورته متعلقة على الحيطة وسط باقي أفراد الأسرة، اتصور مع طفلك في اللحظات السعيدة وعلق الصور في كل مكان في البيت، وافتكر تستخدم في كلامك عبارات زي "بيتك" "أوضتك" "سريرك" لأن العبارات دي بتساعد الطفل يحس بإنه مش غريب وإنه جزء من الأسرة، وافتكر دايمًا إن الصراحة والاعتراف بمشاعر طفلك هيساعد طفلك بشكل كبير على الثقة فيك.
- خصص وقت مع طفلك لوحدكم:
إنك تكون لوحدك مع طفلك ممكن يكون شيء مخيف شوية في البداية خصوصًا لو كان طفل صغير، وأكيد هتسأل نفسك إزاي هقدر أتعامل عن طفل عمره 6 سنين لمدة 5 أو 6 ساعات؟ في الحقيقة مهما كان الوضع صعب لكنه مفيد جدًا على المدى البعيد، الوقت الخاص مع طفلك هيعزز من التواصل بينكم وهيزيد من ثقتك في نفسك كأب جديد..
- اصنع بعض التقاليد:
وجود التقاليد خاصة بينك وبين طفلك هيعزز من الترابط بينكم بشكل كبير جدًا، ودي بعض الأفكار اللي ممكن تطبقها:
- قصة/ أغنية قبل النوم
- فيلم ليلة الجمعة
- تحضير الفطار سوا في يوم محدد أسبوعيًا
- التواصل عن طريق اللعب:
اللعب مع الطفل بيحسس الطفل محبوب ومرغوب فيه، اختار أنشطة منسابة لعمر طفلك تسمحله بالإبداع والقيادة من خلال اللعب، طفلك هيستمتع جدًا وهيستنى وقت اللعب معاك وهيحب اهتمامك الإيجابي بيه...
- عزز علاقتك بزوجتك
طبيعي إن علاقتك انت وزوجتك تتأثر بوجود طفل، خصوصًا مع وجود بعض الضغوطات المتعلقة بالكفالة وبمحاولة تكييف الطفل مع بيئته الجديدة، افتكروا دايمًا إنكم فريق واحد ومحتاجين تكونوا إيد واحدة عشان تاخدوا قراراتكم وتقدروا على مواجهة تحدياتكم، اعتمدوا على بعض كمصدر للدعم، وأول ما تستقر الأمور خططوا عشان تقضوا سهرة أو خروجة مع بعض بعيد عن الطفل ومسؤولياته...
تجربة كفالة طفل من أجمل التجارب اللي ممكن تمر بيها في حياتك، لكنها ممكن مقرونة ببعض التحديات، لو حسيت إن طفلك بيمر بضيق أو بغضب شديد، أو لو كنت قلقان بخصوص تأثير كفالة طفلك على علاقة زواجك أو على أطفالك التانيين، أو لو حسيت بإن علاقتك بطفلك مش بتتحسن بشكل ملحوظ برغم محاولاتك، متترددش في طلب المساعدة من حد متخصص أو حد عنده خبرة عنك في أمور الكفالة، لكن احنا بنطمنك تاني إن الآباء الكافلين قادرين تمامًا على تكوين علاقة ترابط قوية مع أطفالهم المكفولين.
