أحيانًا بعض الأسر الكافلة بتتصرف بعض التصرفات الغلط مع طفلها المكفول من باب حبها ليه وخوفها على مشاعره، لكن للأسف التصرفات دي ممكن يكون ليها آثار سلبية كبيرة على الطفل على المدى الطويل، واحنا في "كفالة" بنسعى دايمًا لدعم الأسر الكافلة والطفل المكفول عشان يعيشوا حياة سعيدة بأقل ضغوط، عشان كدا بنقدملكم هنا 10 حاجات ضروري على كل أم كافلة وأب كافل إنهم يتجنبوهم مع طفلهم المكفول.
- متبالغش في الكلام عن الاختلاف بينكم
يكفي إن طفلك بيسمع أد إيه إن أولاد أعمامهم واخدين عيون جدهم وشعر جدتهم، وطفلك مبيسمعش كلام من دا، فمتزودش انت عليه بالكلام عن الاختلافات بينه وبين باقي العيلة، حتى لو اضطريت للكلام عن الاختلافات أو طفلك بدأ يسألك فانت لازم تجاوبه، بس متخليش الكلام يوصل بينكم لمناقشة عائلية كاملة عن الاختلافات توصل لساعة وساعتين. وفي العموم حاول تحافظ على الحد الأدنى من المحادثات بينك وبين طفلك عن السمات البدنية.
- متحاولش تخفي حقيقة كفالة طفلك عن الناس من حواليك
انت طبعًا مش محتاج تشرح لكل شخص بيقابلك حقيقة كفالة طفلك، مش محتاج توضح الحقيقة لكل شخص بيسألك ليه طفلك مش شبهك؟، بس يكفي إن العيلة والأصحاب في محيطكم يكونوا عارفين الحقيقة.
- متخبيش أسرار
إخفاء الحقيقة عن طفلك مش هيفيد، بالعكس إنت هتخسر ثقة طفلك فيك لما يعرف الحقيقة من حد من قرايبكم أو أصحابكم، فهل انت تحب كدا ولا تحب إن طفلك يعرف الحقيقة منك؟؟ الهمس والأسرار بين الكبار بتخلي الطفل يحس بالضيق خصوصًا لو كان الهمس دا متعلق بيه، عشان كدا متكذبش على طفلك ولا على أي حد وخدها قاعدة عامة في حياتك.
- متستناش لحد ما طفلك يكبر عشان تقوله الحقيقة
حقيقي مفيش أي سبب وجيه يخليك تخفي حقيقة طفلك وهويته الحقيقية عنه، وخليك عارف إن مسيره هيعرف، وكل ما طفلك هيعرف بدري كل ما هيكون أسهل عليه تقبل الحقيقة والتعامل معاها.
- متقولش لطفلك إنت مختلف عننا أو انت مش شبهنا.
ممكن يكون طفلك اجتماعي برغم إنكم عيلة انطوائية أو العكس، ودا شيء طبيعي وممكن يحصل حتى مع طفلك البيولوجي، مفيش طفل ببيطلع 100% شبه أهله والاختلافات شيء وراد جدًا، متركزش على الاختلافات بشكل كبير، دور كمان على التشابهات وحاول تعمل توازن بينهم.
- متخفيش أوراق طفلك المهمة عنه ولا تخبي أي معلومة مهمة عن قصة كفالته.
مستسناش لما طفلك يوصل لـ 18 سنة عشان يشوف شهادة ميلاده الأصلية، أو عشان يعرف هو اتولد فين أو أهله مين، مينفعش طفلك يعدي مرحلة الطفولة وهو مش عارف هو جه منين أو أصله إيه، دا فضول طبيعي عند أي شخص، كل شخص عايز يعرف إيه قصته وايه شكل أهله من النسب، أو حتى سابوه ليه وإزاي، كل شخص ليه بداية، تخيل متبقاش عارف بدايتك إيه!. عشان كدا انت محتاج تجاوب أسئلة طفلك في كل مرة يسألك فيها، كل مرة إديه جزء من معلوماتك، بحيث لما يوصل لمرحلة الـ 12 سنة يبقى عنده كل المعلومات اللي تخص حكاية كفالته.
- مفيش مشكلة لو معندكش أي معلومة بخصوص أهل طفلك من النسب، قول لطفلك إنك للأسف متعرفش أي معلومة عن حياته قبلك، وكان نفسك تساعده بأي معلومة.
متقلقش لو طفلك سألك أسئلة كتير وملقاش إي إجابة منك، أهم حاجة إنك تكون صادق ومش بتتعمد تخبي عنه حاجة، لأن الطفل هيحس وهيعرف صدقك من كذبك، ولو قررت تكذب مرة فانت هتدخل في سلسلة كاملة من الكذب اللي مش هتخلص، وطفلك هيعرف الحقيقة هيعرفها حتى لو عرفها بعد ما بقى عنده 50 سنة أو بعد وفاتك، ووقتها بدل ما يدعيلك هيدعي إن ربنا يسامحك على تضليلك ليه كل الوقت دا.
- متعاملش طفلك معاملة خاصة
اتعامل مع طفلك بطريقة طبيعية جدًا ومتخليش حد يعامله معاملة خاصة بحجة إنه مكفول، طفلك هو ابنك زي أي ابن طبيعي، بيشيل مسؤولية عادية زي أي طفل بيتربى على تحمل المسؤولية، بدون تحميل زايد عليه أو بدون تدليل مفرط. عامل طفلك إنه طفل عادي لأنه بالفعل طفل عادي
- متخجلش من الكفالة ولا تحسس طفلك بإنها حاجة يتكسف منها
لما طفلك يطرح عليك سؤال خاص بكفالته متبصش لطفلك كأنه قال حاجة غلط، ولا تقوله "احنا قفلنا الموضوع دا خلاص"، متخليش طفلك يحس إن كفالته عار أو شيء ميصحش إنه يتكلم فيه، لازم تكون منفتح ويكون البيت بيئة منفتحة للكلام عن الكفالة بمنتهى الشعور بالآمان والراحة، لازم طفلك يحس إنك موجود علشانه في أي وقت ومعندكش أي خوف أو قلق من الكلام عن قصة كفالته.
- تظاهر بإنه مش مكفول، ولكن.
تظاهر بإن طفلك مش مكفول، بس لما طفلك يسألك أي سؤال بخصوص كفالته خليك منفتح ومتحاولش تقفل أو تغير الموضوع، خليك دايمًا واثق إنك بتربي طفل هيكبر وهيكون ليه نفس تقاليد وثقافة أسرتك، فانت محتاج تشركه معاك في كل حاجة كأسرة واحدة، لأن دا اللي بتعمله الأسر الحقيقة، بيعملوا كل حاجة مع بعض.
ولأن كل شخص في الدنيا بيحتاج يحس إنه محبوب أو مسموع، لكن دا مش مبرر عشان تخفي عن طفلك حقيقة كفالته خوفًا على مشاعره، طفلك مش محتاجك تكذب عليه أو تخبي عنه حقيقته، هو محتاج يحس إنك دايمًا موجود علشانه، موجود علشان تدعمه، وإن حتى لو شخص تخلى عنه في مرحلة من مراحل حياته لسبب معين، ففي شخص تاني هيدعمه وهيحبه وهيفضل جمبه طول الوقت ولآخر العمر.
طفلك محتاج يحس إنه معملش حاجة غلط كانت سبب في تخلي أسرته عنه، محتاج يحس بإن ليه أسرة بينتمي إليها، أسرة فعلًا بتحبه وبتدعمه بدون أي شروط، ودا عمره ما هيحصل لو طفلك اكتشف في يوم إنك خبيت عنه حقيقته أو ضللته بمعلومة غلط في يوم من الأيام.
