أحد الأسر المقبلة على الكفالة وفي انتظار وصول طفلها بعتتلنا سؤال بيقول: "إزاي تقدر الأسر الكافلة ترحب بطفلها المكفول في بيتها وتبني معاه علاقة كويسة من البداية؟؟"
ولأن احنا في "كفالة" يهمنا إن كل أسرة كافلة تستمتع برحلة كفالة طفلها مع أقل التحديات الممكنة، بعتنا السؤال دا لأكتر من أسرة كافلة عشان يجاوبوا إجابات مبنية على التجربة تساعد الأسرة دي على الترحيب بطفلها، ودي كانت بعض نصايحهم:
النصيحة الأولى:
"الترحيب بالطفل شيء ضروري وبيدي إشارة على شكل علاقتكم بيه من البداية، بس عشان تحدد الطريقة الصح للترحيب بطفلك، فانت محتاج تحط في اعتبارك عمر الطفل وكمان الصدمات اللي اتعرضلها في حياته"
النصيحة التانية:
"ممكن تبدأ بتعريف طفلك على أفراد أسرتك، لو عندك أولاد غير طفلك المكفول أو لو حد من أجداد الطفل عايشين معاكم في البيت، خد جولة في البيت مع طفلك، وريه أوضته وعرفه مكان الحمام والمطبخ ولو في أوضة للعب، اعرض عليه وجبة خفيفة، وهو بياكل قوله باقي خطتك لليوم عاملة إزاي عشان الطفل يعرف يتوقع اللي هيحصل باقي اليوم"
النصيحة التالتة:
"بعد ما تدخلوا البيت انزل على ركبتك وخليك في مستوى نظر طفلك، ممكن تحضنه بس حط في اعتبارك إن بعض الأطفال هتفضّل إنك تطبطب على كتفها أكتر من إنك تحضنها، قول لطفلك إنك مقدر خسارته لأصحابه في الدار وإنك هتحاول توديه يزورهم دايمًا، قوله إنك هتبذل أقصى ما عندك عشان تقدمله كل الحب والرعاية والأمان اللي محتاجهم"
النصيحة الرابعة:
"لو طفلك كبير فطريقته هي اللي هتحدد طريقة ترحيبكم بيه، احترم مشاعره ومتفرضش عليه معلومات وقواعد كتير من البداية، اديه وقته عشان يستقر ويوصل لنقطة إنك موجود دايمًا لمساعدته وبعدين حط قواعدك براحتك"
النصيحة الخامسة:
"لو هتكفل طفل كبير، فتحديد القواعد من البداية بيكون مفيد، لأنهم بيكونوا متفهمين ومستعدين يسمعوك، وغالبًا مش هيحبوا يسمعوا منك انتقادات فيما بعد بإيه اللي مفروض يتعمل وإيه اللي ممنوع، إديهم وقتهم وفرصتهم يعملوا الحاجة اللي بيحبوها، لو بيحبوا يسمعوا موسيقى أو يلعبو فيديو جيمس، اديهم وقتهم عشان يتأقلموا"
النصيحة السادسة:
"حط في اعتبارك إن الطفل مش هيموت من الجوع لو رفض ياكل وجبة أو اتنين او تلاتة حتى، حاول معاه مرة واتنين وسيبه يجي وقت ما يكون مستعد، متضيعش طاقتك في حاجات صغيرة، لأن في حاجات أكبر مستنياك محتاجة الطاقة دي، خليك لطيف ومتعاطف في تعاملك مع طفلك، وافتكر إن مفيش حاجة بتتبني في يوم، وإنك مش محتاج تخلي كل حاجة مثالية من أول يوم، التدريج والتقبل لتحديات المرحلة هيوصل بيك وبطفلك لعلاقة كويسة محتاجة منكم لوقت وصبر"
